सरकारी नोकरीची कहानी

नऊ लाख डोनेशन
देणे कबुल झाले
सरकारी सेवेत रुबाबत
कर्मचारी रूजु झाले !  ....🖋

         घरातल्या घरात
         भांड्याला भांड थटु लागलं
         माय लेकरांचे प्रेम
         दुधासारखं अटु लागलं

सासु -सासऱ्याशी पटेना
मॅडम म्हाणाल्या वेगळं राहु
चार गुंठे , फ्लॅट
हपत्या हपत्या घेवू  !

         सोसायटीचे दहा लाख
          पंचवीस लाख गृह कर्ज
          रंग-रंगोटीसाठी
          पुन्हा पतसंस्थेत अर्ज  !

इतका देखणा बंगला
साधी पुजा चालेल कशी
नात्यागोत्यांच्या नाकावर
बसु नये माशी  !

               चार चाकीशिवाय
               बंगला काय शोभत नाही
               थोडे कर्ज वाढले म्हणून
               बंगलाकाय डुबत नाही

आंधळा विचार  मॅडमचा
कसा दिसेल धोका
ताटाखालच्या मांजराचा
झालाच नाही बोका  !

                बघता बघता घरात
                तिनदा हलला पाळणा
                चुकला हिशोब खर्चाचा
                घेतला नाही  खेळणा  !

व्याज, हप्ता,  कर्ज
सुसूत्र काय जमेना
कर्मचारी मन
नोकरीत सुध्दा रमेना  !

                 हातात किती पगार
                सांगायची लाज वाटते
                 पुर्वी फुटायची बिअर
                आता फक्त देशी फूटते

उपवर मुलगी लग्नाची
पुन्हा झुकली मान
सोयऱ्यासाठी पायपिट
फाटून गेली वहान  !
           
    " आज कर्मचारी सेवा निवृत्त"

            कर्ज फेडण्यात गेली हयात
              आज साठी गाठली
                 पोरांनी हळूच
              रक्कम फंडाची लाटली !

सुख समाधान शांतीसाठी
देवळात जावून बसतात
काय कमावले आयुष्यात
हिशोब करत असतात   !
             
             मांडीवर घेऊन नातवाला
              कर्मचारी सांगे कहाणी
              एका डोळ्यांत हासु
             दूसऱ्या डोळ्यांत पाणी!